Juan Carlos Prieto, xerente de Mesón O Castro: “O noso obxectivo é facer sentir ben aos clientes”
Falamos con Juan Carlos Prieto, xerente de Mesón O Castro de Sarria.
Desde cando levan en funcionamento?
Mesón O Castro leva funcionando case seis anos, xa que abrimos as portas do noso local o día 7 de decembro do 2017.
Como xorde o Mesón O Castro?
A miña prima e eu puxemos en marcha este proxecto debido a que ambos perdéramos os nosos respectivos traballos. Ademais, esta idea tamén xorde debido a que a nosa familia estivo vinculada sempre a este sector.
Había necesidade en Sarria dun sitio como este?
Baixo o meu punto de vista, si.
Que comidas ofrecen?
De martes a venres, só ao mediodía, ofrecemos un menú, o cal está elaborado no propio día e con produtos frescos e caseiros. Ademais, contamos cunha carta variada de martes a domingo.
Cal é o prato con maior aceptación? E a sobremesa?
Hai varios pratos que xeran sensacións entre os nosos clientes... Pero se tiveramos que escoller algún, serían as troitas e o churrasco de tenreira. No caso da sobremesa, o flan de turrón; aínda que contamos con sobremesas artesanais e outros elaborados por unha empresa. No noso mesón elaboramos o mencionado flan de turrón e o de café.
Fan reservas para grupos? E envíos ás casas?
Facemos todo tipo de reservas, xa que intentamos adaptarnos sempre aos nosos clientes.
En canto os envíos a domicilio, aínda non se están efectuando debido a que a empresa responsable deste servizo non comezou a traballar.
Cómpre destacar que sempre que os nosos clientes o desexen poden acudir a recoller a súa comida e levala.
Teñen moita afluencia de xente?
Ao igual que en todos os negocios, depende un pouco do día... pero en liñas xerais, temos bastante afluencia de xente.
A fidelidade é unha das características dos vosos clientes?
Si, a verdade é que contamos con un amplo abano de clientes habituais.
En que temporada aumenta e por que?
A afluencia de xente aumenta a partir do mes de abril, xa que a nosa ampla terraza nos permite acoller a máis clientes.
En que temporada descende e por que?
A partir do mes de novembro, posto que o mal tempo impídenos acoller a tantas persoas como no verán.
Ademais da comida, por que é recomendable ir a Mesón O Castro?
Persoalmente, cando acudo a un restaurante gústame que me ofrezan un trato familiar, é dicir que me fagan sentir como na miña casa... e ese é o noso obxectivo principal, facer sentir ben aos nosos clientes.
Ademais, na época do verán contamos cunha gran terraza, a cal está rodeada de natureza e anexa a unha zona verde na que os nenos e as nenas poden xogar.
Cales son os horarios e días que se traballa?
De martes a sábado de 12.30 horas ata peche. E os domingos de 12.30 a 17.00. É dicir, os nosos días de descanso son o domingo a noite e o luns todo o día.
Cantas persoas traballan no restaurante?
Traballamos seis persoas.
Teñen algún proxecto de cara ao futuro para potenciar que máis xente se achegue?
O noso obxectivo principal é seguir mellorando día a día, co obxectivo de ofrecer o mellor servizo posible aos nosos clientes.
Ademais, temos en mente varios proxectos cos que pretendemos mellorar as nosas instalacións.
Poden contarnos algunha anécdota?
Quizás a anécdota máis graciosa foi cando un cliente entrou na cociña a darlle un bico e un abrazo a cociñeira por facer tan ricos os flanes de turrón. Existen outras moitas... pero preferimos gardalas para nós.
Ao noso mesón acudiron persoas coñecidas como Sergio Vallejo o Paloma Lago, a cal visitou ao noso local durante a gravación dun dos seus programas.
Algunha cousa que queiran engadir?
Tan só nos gustaría agradecer o labor que dende este xornal facedes, posto que ofrecedes visibilidade aos locais de Sarria e vos achegades aos lectores, logrando que algúns deles se convertan nos nosos clientes.
