Kumpania Algazarra, nova confirmación para o Festival Terra Brava
Os organizadores do Festival Terra Brava acaban de anunciar unha nova incorporación ao cartel do evento gratuíto que se celebrará o 16 de agosto no Incio.
Trátase da banda portuguesa Kumpania Algazarra, recoñecida pola súa enerxía arrolladora e a súa mestura explosiva de afrobeat, ska e ritmos balcánicos.
Consolidada como unha das bandas máis festivas do panorama europeo, Kumpania Algazarra ten levado o seu directo por innumerables festivais, onde a súa música converte cada concerto nunha auténtica celebración.
Os asistentes ao Festival Terra Brava poderán desfrutar dun espectáculo vibrante e cargado de enerxía, onde o baile e a diversión estarán garantidos de principio a fin.
O evento, que cada ano reúne a centos de persoas no Incio, promete unha edición inesquecible con esta nova confirmación.