Láncara acollerá unha xornada de doazón de sangue na Pobra de San Xiao
O municipio de Láncara sumarase de novo á campaña de doazón impulsada pola Axencia de Doazón de Órganos e Sangue (ADOS), que instalará a súa unidade móbil o martes 16 de decembro na Praza dos Labregos, na Pobra de San Xiao. A iniciativa desenvolverase en horario de 16.00 a 21.00 horas e busca animar a veciñanza a participar nun acto solidario que pode contribuir a salvar vidas nestas datas.
A campaña, baixo o lema O mellor agasallo, lembra que doar sangue é un xesto sinxelo, rápido e ao alcance de todas as persoas maiores de 18 anos e con máis de 50 quilos de peso. ADOS recomenda almorzar e, despois de xantar, esperar dúas horas antes da doazón, ademais de acudir coa tarxeta de doante ou co DNI. Tamén se pide informar ao persoal sanitario no caso de estar tomando algún medicamento e evitar comidas copiosas antes do proceso.
A entidade sanitaria insiste na importancia de manter as reservas estables durante todo o ano, especialmente en períodos nos que adoita diminuír a participación. Por iso, anima á cidadanía de Láncara e das localidades próximas a achegarse á unidade móbil e colaborar nunha acción solidaria que pode resultar vital para moitos pacientes.