Láncara pon en marcha os Espazos das Familias para apoiar a crianza de nenos e nenas de 0 a 3 anos
O Concello de Láncara anunciou o inicio do programa Espazos das Familias, anteriormente coñecido como Preescolar na Casa, unha iniciativa dirixida a nenos e nenas de 0 a 3 anos. Trátase dun servizo municipal gratuíto que se desenvolverá en colaboración coa Asociación socio-educativa Antonio Gandoy, co obxectivo de ofrecer apoio ás familias nos primeiros anos de crianza.
A proposta pretende crear un lugar de encontro onde as familias poidan compartir experiencias, resolver dúbidas e aprender en compañía doutras persoas, sempre co acompañamento dun profesional da educación. Os encontros incluirán actividades adaptadas a cada etapa evolutiva, nun ambiente lúdico e relaxado.
Entre os seus obxectivos está favorecer a socialización temperá dos máis pequenos, ofrecer recursos que promovan unha maternidade e paternidade consciente e apoiar o desenvolvemento integral da infancia no municipio. O servizo está aberto a todas as familias de Láncara con fillos e fillas de 0 a 3 anos, independentemente de se acoden ou non á escola infantil.