Literatura, obradoiros, cine e música para encher de actividades Sarria durante o mes de marzo
O Concello de Sarria deu a coñecer a súa completa programación cultural para o mes de marzo, cunha ampla variedade de actividades para todos os públicos.
A programación comezou o venres 7 de marzo co espectáculo de circo de Pinocho o venres e o sábado, e coa presentación do poemario 'Amor(Exia)' de María Barrado García o venres.
Ademais, durante a tarde de hoxe, sábado 8 de marzo, desenvolverase a carreira Vivas e Iguais en favor do Día da Muller.
O domingo 9, a Casa da Cultura acollerá ás 13.00 horas un concerto especial polo día da muller, ofrecido pola Banda de Música da Comarca de Sarria. Ademais, de 12.00 a 17.00 horas, o circo de Pinocho volverá instalarse na Rúa Castelao para o goce dos asistentes.
O xoves 13, ás 17.30 horas, os máis pequenos poderán participar no Clube de Lectura Infantil na Casa da Cultura, unha actividade que se repetirá o xoves 27 á mesma hora e no mesmo lugar.
O sábado 15, ás 17.30 horas na Casa da Cultura, proxectarase a película 'Vinni - Pukh' de Fyodor Khitruk, un evento apto para todos os públicos.
O venres 21, ás 12.00 horas, a Praza da Vila será o escenario dun recital con motivo do Día da Poesía, promovendo a literatura entre os veciños.
O sábado 22, tamén na Casa da Cultura, ás 17.30 horas terá lugar un obradoiro infantil titulado 'Versos no Aire', fomentando a creatividade entre os máis xoves a través da poesía.
Finalmente, o sábado 29, a programación cultural de marzo culminará coa actividade Cantos de Taberna na Vila de Sarria a partir das 18.00 horas, unha ocasión perfecta para gozar da tradición musical nun ambiente festivo.