Lóuzara renderá homenaxe ao poeta Fiz Vergara cunha placa na súa casa natal
O vindeiro 10 de maio, a parroquia de Lóuzara converterase nun espazo de memoria e recoñecemento ao poeta Fiz Vergara Vilariño, figura destacada da literatura galega contemporánea. O Concello de Samos organiza un acto simbólico no que se descubrirá unha placa conmemorativa na casa natal do autor, como forma de perpetuar a súa pegada no territorio que o viu nacer.
A homenaxe, aberta a toda a veciñanza e público en xeral, celebrarase ás 13:00 horas e busca poñer en valor a obra e a traxectoria de Fiz Vergara, cuxo compromiso coa lingua e a cultura galega foi unha constante ao longo da súa vida. Trátase dun recoñecemento que leva tempo madurándose e que por fin se materializa co apoio de distintas entidades culturais e veciñais.
Tras o acto, as persoas asistentes que así o desexen poderán participar nun xantar conmemorativo ás 14:30 horas na Casa de Aira Padron. Para acudir á comida é preciso realizar reserva previa, ben directamente no restaurante ou chamando ao teléfono 982 546 063, onde tamén se pode retirar a correspondente tarxeta.
Con esta iniciativa, Samos reafirma o seu compromiso coa difusión da obra dos seus creadores locais, contribuíndo a manter viva a memoria dos que fixeron da palabra un acto de beleza e resistencia.