Luis Celeiro presenta en Láncara o libro Andares, unha escolma do seu traballo xornalístico
A Biblioteca Pública Municipal Basilio Losada, na Pobra de San Xiao (Láncara), será escenario este venres, 2 de xaneiro de 2026, da presentación do libro Andares, unha publicación que recompila unha escolma de artigos da sección xornalística “Tía Manuela”, da autoría do xornalista Luis Celeiro Álvarez. O acto dará comezo ás 19:00 horas e contará con entrada libre.
A obra reúne textos que reflicten o percorrido profesional do autor a través dunha mirada persoal e comprometida coa realidade social e cultural do país, ofrecendo ao lector unha visión crítica e reflexiva do día a día, construída desde a palabra xornalística.
Na presentación intervirán diversas voces vencelladas ao ámbito institucional, cultural e dos medios de comunicación. Participará Alba Sangil de Andrés, concelleira de Desenvolvemento Local, Cultura, Deporte, Medio Ambiente, Participación Veciñal e Novas Tecnoloxías; Marta Fernández Horbán, presidenta da Asociación Cultural Val de Láncara; Lucía Porto Jacob, xornalista e redactora de El Progreso; e o propio Luis Celeiro Álvarez, que falará sobre o proceso de creación do libro e o significado dos textos recompilados.
O acto conta coa colaboración do Concello de Láncara, da Asociación Cultural Val de Láncara e da libraría Lar Libros, converténdose nunha cita cultural destacada para os amantes da literatura e do xornalismo en lingua galega.