Máis de 50 familias participaron na primeira sesión formativa sobre compostaxe doméstica en Sarria
Máis de 50 familias de Sarria participaron na primeira sesión formativa sobre compostaxe doméstica organizada polo Concello, que incluíu a entrega dos seus respectivos composteiros, aireadores e manuais de uso.
"A sesión foi todo un éxito de participación e supón un importante avance na redución dos residuos orgánicos que rematan no colector convencional", explican desde o Concello.
Grazas á compostaxe, estes restos transformaranse nun valioso abono natural para hortas, xardíns e plantas, promovendo así a economía circular e o coidado do medio ambiente.
Desde o Concello de Sarria animan a toda a veciñanza a sumarse á iniciativa e lembran que é imprescindible asistir á sesión formativa para aprender a utilizar correctamente o composteiro e aproveitar ao máximo os seus beneficios.
As persoas interesadas poden inscribirse a través da web https://sarria.rsu.gal e esperar á próxima convocatoria. Para máis información, tamén se pode contactar no teléfono 647 521 464 ou no correo electrónico residuos@sarria.gal.