María Barrado presenta 'Amor(Exia)' este sábado no Bar Xarope
Este sábado, 5 de abril, o Bar Xarope acollerá a presentación do poemario Amor(Exia), da escritora María Barrado García. O acto dará comezo ás 20.00 horas e contará coa presenza da autora, quen estará acompañada polo poeta Xosé Casar. Ademais, o evento incluirá a actuación musical de Proyecto Valley.
O poemario Amor(Exia) é unha composición de poemas nacidos dun momento difícil na vida da autora, quen atravesou unha etapa de ansiedade e depresión. Segundo explica Barrado García, o título da obra é "un xogo de palabras, unha mestura entre o amor por unha mesma e 'Exia', pola anorexia. Ao final, o que saca unha de todas esas malas experiencias é o amor por unha mesma".
A presentación promete ser unha velada especial, onde a poesía e a música se unirán para ofrecer unha experiencia enriquecedora ao público asistente.