Agro

Gómez afirmou que proxectos como este fomentan a dinamización do rural e a fixación de poboación, sen esquecer a modernización e innovación grazas a tecnoloxías avanzadas

A conselleira do Medio Rural, María José Gómez, puxo en valor “a riqueza e o dinamismo” do agro galego, onde destaca a iniciativa da Ecogranxa Teijeiro, a maior explotación de porco celta rexistrada en Asoporcel e situada no Concello do Incio.

Durante unha visita ás instalacións, acompañada polo alcalde Héctor Corujo e o delegado territorial da Xunta en Lugo, Javier Arias, a conselleira felicitou aos promotores deste proxecto, que salientou por aproveitar os recursos endóxenos do rural ao potenciar unha raza autóctona de Galicia.

A Ecogranxa Teijeiro non só aposta pola gandaría en extensivo e a gastronomía, senón que tamén promove o uso do medio natural para actividades lúdicas, deportivas e culturais. Un dos aspectos máis notables desta iniciativa é a recuperación das terras, unificando preto de 30 parcelas de propietarios en tres continentes para crear unha explotación de 20 hectáreas, a máis grande de Galicia.

Gómez afirmou que proxectos como este fomentan a dinamización do rural e a fixación de poboación, sen esquecer a modernización e innovación grazas a tecnoloxías avanzadas, como o seu sistema de recollida de xurros. Esta visión está en liña coa aposta da Xunta, que recentemente abriu unha convocatoria de axudas para as razas autóctonas gandeiras dotada de 220.000 euros, coa finalidade de apoiar iniciativas rurais vivas e con futuro.

Por último, a conselleira lembrou que o titular da Ecogranxa Teijeiro beneficiouse cunha axuda de 125.000 euros para a incorporación ao agro e a mellora da explotación. Este tipo de apoios son parte dun compromiso intenso por un rural galego dinámico e con perspectiva.