María Vázquez recibiu o XXIII Premio Ramón Piñeiro Facer País nun acto marcado pola reivindicación cultural
A actriz María Vázquez foi distinguida co XXIII Premio Ramón Piñeiro Facer País, outorgado pola Asociación Cultural Val de Láncara, nunha xornada que congregou na Pobra de San Xiao diversas persoas destacadas do panorama cultural da provincia de Lugo.
A celebración comezou ás 12.00 horas na Casa do Concello, onde a homenaxeada asinou no Libro de Honra tras compartir un encontro coa concelleira de Cultura de Láncara, Alba Sangil; o vicepresidente da Deputación de Lugo, Efrén Castro; e a presidenta da entidade organizadora, Marta Horbán. Nese momento inicial, as tres figuras institucionales subliñaron a relevancia de continuar facendo cultura en Galicia.
A concelleira Alba Sangil salientou que é posible desenvolver unha traxectoria profesional no eido cultural dentro de Galicia, sen necesidade de marchar a Madrid, e destacou o labor da Asociación Val de Láncara por promover un premio consolidado e por converter o concello nun referente cultural. Afirmou tamén que María Vázquez representa á perfección eses valores. Pola súa parte, Efrén Castro cualificou a xornada como “unha festa” e recoñeceu o papel do Concello e da asociación, ademais de lembrar que as últimas premiadas do galardón foron mulleres feministas que hoxe son referentes para toda a sociedade.
Durante a súa intervención, María Vázquez afirmou que, en realidade, deberían ser os presentes quen recibisen o premio polo seu labor en favor de facer país a través deste tipo de iniciativas culturais.
A actividade continuou logo na antiga escola de Láncara, onde se celebrou o acto de entrega do galardón —construído polo artesán Marcos Ladra—. A organización decidiu non ir á ponte de Carracedo, como se prevía inicialmente, debido á chuvia que marcou a xornada.