Deportes

Mateo, de Portomarín, e Álex, de Monforte, e ambos da AC Taekwondo Sarria, conseguiron a medalla de ouro cos seus respectivos equipos

Mateo Fernández, deportista de taekwondo de Portomarín, que adestra na Escola Taekwondo Sarria da man do recoñecido Álex Losada, máis coñecido como Álex Camba, acadou o título de Campión de Europa no Campionato de Europa celebrado en Tallin, Estonia.

Xunto con Aitor, do Club Neka de Monforte, e con Hugo Arnoso, que participaron na categoría por equipos en trío júnior, Mateo alzouse coa súa primeira medalla europea, sendo esta de ouro. Na primeira rolda venceron con contundencia a Gran Bretaña e na final realizaron unha actuación "aínda mellor" contra Turquía, para así subir ao máis alto do podio, tal como explicou o seu adestrador Álex Losada, que tamén competiu no Europeo.

“Un feito formidable e extraordinario e un grandísimo orgullo para Portomarín, para a escola e para Sarria contar con este novo título. Con Hugo e Aitor formaron un equipazo que se viu reflectido no resultado”, afirmou Álex.

Pola súa parte, xunto cos seus compañeiros Marco García e Carlos Rey, do Club Neka de Monforte, Álex competiu na categoría sénior por equipos, acadando de novo un ouro. Álex e Carlos eran os vixentes campións de Europa, e gañadores desta categoría nos dous últimos europeos de 2021 e 2023, polo que, con este título, coróanse como tricampións de Europa e manteñen a hexemonía na devandita categoría. Venceron a Portugal na primeira rolda, despois a Bulgaria, nas semifinais a Francia e na final a Alemaña. Desde a primeira ata a última rolda, o equipo non deu opción a ningún dos seus rivais, amosando unha gran superioridade en todas as fases e acadando, unha vez máis, ser campións de Europa indiscutibles.

“É un suceso extraordinario e excepcional acadar unha medalla europea, e moito máis complicado que ambas sexan de ouro. É un orgullo para nós levar o nome de Sarria por todo o mundo e con resultados coma estes”, afirmou Álex Losada.