Alcaldesa de Paradela: “Traballo, responsabilidade e intentar solucionar os problemas”
Jessica Fernández
O pasado 19 de xaneiro, Montserrat Muler fixo un ano como alcaldesa de Paradela, un percorrido que valorou de forma “positiva”, xa que “son unha persoa traballadora que sempre está aberta a aprender da xente e das situacións. Asumir a Alcaldía foi un reto, porque cambias de responsabilidades con respecto á etapa de concelleira, pero sigo con ganas de traballar e non eludo as miñas responsabilidades, polo que sigo afrontando este labor con enerxía”.
A rexedora sostén que o que máis lle gusta deste cargo é “o trato próximo coa xente, o contacto persoal e escoitas as súas necesidades para poder darlles solución na medida do posible. A min benefíciame a miña profesión, xa que sempre estiven do lado da xente, trato cos veciños e veciñas e ir avanzando e aprendendo ao lado deles. Non hai fórmulas máxicas, hai traballo, responsabilidade e intentar solucionar os problemas do día a día; esa é a esencia fundamental da política”, destaca.
Durante este ano leváronse a cabo distintas iniciativas para mellorar o municipio de Paradela, como o arranxo de diferencias vías, accesos a núcleos ou a entrega de lotes de produtos de primeira necesidade a familias que acaban de ter un fillo. “Do que me sinto máis orgullosa deste primeiro ano son as iniciativas que teñen que ver coas persoas maiores, cos nenos e coas persoas que traballan a terra, xa que somos un concello no que prima o sector primario. Por iso, levamos a cabo iniciativas que lles facilitaran a vida a estes grupos de poboación e, en xeral, a todo o municipio. O máis importante son as vías de comunicación, xa sexan terrestres como as estradas, como as novas tecnoloxías, xa que todo o mundo necesita conectarse para traballar, para desenvolver calquera trámite administrativo, e niso estamos”, explica.
SEGUIR MELLORANDO PARADELA
Os proxectos levados a cabo durante este primeiro ano de alcaldesa por parte de Montserrat Mulet serán os que continúen durante a súa lexislatura ata 2027, poñendo o foco nas “axudas para o fomento da natalidade, que ten como obxectivo asentar poboación no rural, xa que é fundamental: podemos traballar moito, pero se non temos unha xeración que estea no futuro, o traballo non se verá recompensado”, subliña.
Tamén pon o énfase no sector empresarial, “seguiremos fomentando o viveiro de empresas e promovendo o ámbito empresarial, así como o turismo, xa que Paradela ten unha localización privilexiada, ao formar parte do Camiño Francés e da Ribeira Sacra. Por iso, tamén debemos apostar por conservar a nosa riqueza patrimonial, cultural e gastronómica, así como estar abertos a novas posibilidades para incorporar empresas e poboación, que poidan vivir do sector primario porque é o motor da economía e estar aí con eles, apoiándoos”, destaca.
Con respecto ao emprego, a alcaldesa engade que “un dos logros que queremos resaltar é o feito de poñer a andar o obradoiro de emprego, que hai moitos anos que non tiñamos, e é un éxito ademais porque está compartido por tres concellos gobernados por diferentes partidos políticos: Paradela, Samos e Láncara”, sostén.
Ademais, a rexedora admite que un dos problemas de Paradela é a vivenda, polo que están barallando algunha idea para poder resolver esta cuestión, pero “necesitamos a axuda das outras administracións, xa que contamos con 1,8 millóns de euros de orzamento, diñeiro que xa se gasta maioritariamente no mantemento dos servicios e algunha inversión. Eu son de traballar e queremos seguir avanzando niso, así como no polígono agroforestal, pero dependemos de financiación externa e hai moita competencia, xa que todos los concellos somos a pedir, polo que as administracións priorizan, pero cada un defendemos o noso territorio e eu pelexarei todo o que estea na miña man por este concello”.
A XENTE DE PARADELA
A alcaldesa de Paradela tamén quixo facer mención ás persoas e colectivos que forman parte do municipio e o poñen no mapa. “As asociacións son o motor cultural do municipio. Temos a Banda de Música de Paradela, cunha tradición de máis de 150 anos que perdura grazas ao labor que fan na súa escola, incorporando ademais gaiteiros e coros cos nenos e nenas do concello, polo que nós desde o Goberno local os seguiremos apoiando e intentaremos promover melloras no lugar onde ensaian para que estean más cómodos”.
Tamén menciona a Asociación de Mulleres de Paradela, que conta con arredor de 200 socias non só de Paradela, senón tamén de concellos limítrofes: “Son unhas traballadoras, sempre organizando actividades, viaxes e comidas. É un traballo encomiable. Teñen unha vitalidade e unhas gañas de traballar que valoramos desde o Concello de Paradela, polo que seguiremos apoiando as súas iniciativas”.
Por outro lado, a rexedora tamén pon en valor o equipo de fútbol a SD Paradela, que “axuda a que os mozos novos participen da actividade deportiva, así como o fagan os veteranos, promovendo que a xente se xunte os días que hai partido para animar aos xogadores”.
Finalmente, lembra que nas parroquias hai dúas asociacións, a de Vilaragunte e a de Castro de Rei de Lemos, que tamén apoian desde o Concello para poder manterse; así como lembra a asociación O Carrual, que vela pola conservación dos caneiros de Paradela, Guntín, Portomarín e O Páramo.
Como conclusión, Montserrat Mulet sostén que ser alcaldesa é “un traballo constante, xa que é estar día a día ao lado dos veciños escoitando as súas necesidades e resolver o máis urxente. A xente ten que entender que non somos Deuses; non podemos solucionar todos os problemas, ademais de que as cousas levan tempo, non se resolven de forma inmediata; polo que nós nos centramos no día a día e mirar cara ao futuro de forma positiva”. Por iso, conclúe que “o meu proxecto nos vindeiros anos será apostar polo traballo diario, cos pés na terra, e sobre todo aprendendo dos maiores, que nos dan moitas leccións de vida e hai que seguir contando con eles na nosa sociedade”.