Adiado o 'Move os Marcos', que se ía celebrar este domingo en Sarria, pola previsión de chuvia
Desde a Vicepresidencia da Deputación de Lugo veñen de informar de que, debido á previsión de chuvia deste domingo, 18 de maio, o Festival Move os Marcos será adiado para celebrarse o vindeiro 20 de xullo no Meigallo, mantendo a programación proposta.
Este encontro, pensado para convocar público de toda Galicia, inspírase na lembranza do promotor cultural sarriao Marcos López, falecido o verán pasado e figura imprescindible da edición e do audiovisual galego nas dúas últimas décadas.
Move os Marcos, co fin de promover un espazo cultural no que estarán presentes a música, a literatura, a gastronomía e o activismo; incluirá actividades e espazos para a creación e a reflexión, cun recital poético musical, intervencións artísticas colectivas ou unha palestra sobre dereitos das persoas LGTB e dereitos lingüísticos nun contexto de auxe dos discursos de odio, así como unha ampla axenda pensada para a cativada, con contacontos, construción de xoguetes sonoros, obradoiros creativos e espazos de lecer libre.
Ademais, acollerá os concertos de Mondra, que estreará o seu segundo álbum 'De Ronda', e o cuarteto De Vacas, así como haberá actuacións de Peleriños e Meigas e Trasgos.
O recinto do festival tamén acollerá tamén unha zona gastronómica cunha selección de produtos da comarca.
Programa do Festival
O programa do evento Move os Marcos presenta unha completa e diversa xornada de actividades culturais, musicais e artísticas pensadas para todos os públicos, coa intención de encher Sarria de creatividade, reflexión e celebración.
A xornada comezará ás 11.30 horas coa tradicional alborada a cargo da Asociación Cultural Peleriños de Sarria, que percorrerá o Bulevar, o Malecón e o Parque do Chanto, anunciando coa súa música o inicio da festa. Ás 12.00 horas terá lugar o pregón inaugural, seguido, ás 12.30 horas, do recital escénico “Canto en Parada”, unha proposta multidisciplinar con poesía de Luis Alonso e percusión de Rafa Mallo. Uns minutos despois, ás 12.45 horas, celebrarase a “Parolada diversa: Move os teus marcos”, unha mesa de diálogo con destacadas voces do ámbito cultural, educativo e activista como Carlos Callón, Daniela Fernández, Braulio Vilariño, Ana Ojea e Chené Gómez, moderados pola xornalista Eva Mejuto.
A continuación, ás 14.30 horas, celebrarase unha sesión vermú acompañada dun xantar festivo coa música de A Duendeneta Dilleis. Xa pola tarde, ás 16.00 horas, está prevista unha visita guiada á exposición “Galegoza. A canción en galego”, seguida da actuación das pandereteiras da AC Peleriños de Sarria ás 16.30 horas. A música continuará ás 17.00 horas coa actuación do grupo De Vacas e ás 18.00 horas con Mondra. Ás 19.00 horas, ambos artistas protagonizarán unha colaboración especial e inédita que servirá como peche musical da xornada principal do festival.
Tamén haberá unha ampla oferta de actividades para os máis pequenos. Ás 12.30 horas comezará a sesión de contos “O conto do Traxugas” con César No, e simultaneamente desenvolverase un obradoiro de xogos sonoros, onde os nenos e nenas poderán crear asubíos de abelá, carrizos de noz e ruxerruxes da man de Xaneco Tubío. Ás 13.00 horas terá lugar un obradoiro para facer pulseiras coloridas. Pola tarde, entre as 16.30 e as 18.30 horas, repetirase o taller de xogos sonoros, mentres que tamén ás 16.30 horas se desenvolverá o obradoiro “Retrato en Collage Palestina”, unha actividade creativa en parellas para explorar a técnica do collage. Finalmente, ás 18.00 horas, celebrarase o obradoiro “Abano de cores”.
O evento contará tamén con outras propostas paralelas como a exposición fotográfica “As outras voces”, sobre o traballo da ONGD Creart na franxa de Gaza, e a intervención artística colectiva “Artivista: Enlázate a Gaza”, centrada na situación do pobo palestino. Ademais, durante o festival desenvolverase “Tecer sobre o valado: Galiza”, unha acción artística colectiva con elementos naturais e coloridos, e estará dispoñible o “Andel de cores”, un espazo de venda de libros a cargo da libraría Galicia 1932. O público tamén poderá gozar da “Zona Gastro”, un espazo onde se ofrecerán produtos alimentarios seleccionados da comarca.