Nova Escena Teatro leva a Sarria o espectáculo E.L. (Expectativa Lonxana)
A compañía luguesa Nova Escena Teatro presentará este domingo na Casa da Cultura de Sarria o seu espectáculo E.L. (Expectativa Lonxana), dentro do Circuíto de Teatro Afeccionado da Vicepresidencia da Deputación de Lugo.
A obra parte dun encontro casual: catro mulleres coinciden no mesmo banco dun parque, cada unha coa esperanza de que o amor que as espera se faga realidade. O que en principio semella un encontro irreconciliábel convértese nun espazo no que se abren catro universos íntimos, con máis puntos en común do que cabería esperar.
A representación terá lugar o domingo 30 de novembro ás 20:00 horas na Casa da Cultura de Sarria, ofrecendo ao público unha experiencia teatral chea de emoción, humor e reflexión sobre as relacións e as expectativas que cada persoa proxecta.