O Buril de Sarria acolle a actuación de dúas bandas Sarria de heavy metal
Sarria converterase este venres, 11 de xullo, no epicentro do heavy metal internacional cun concerto que promete ser unha auténtica explosión de enerxía e paixón rockeira.
A mítica Sala Buril abrirá as súas portas ás 21:30 horas para acoller unha velada única que reunirá dúas bandas con propostas potentes e ben diferenciadas, dispostas a facer vibrar ao público galego.
Desde o Perú aterriza por primeira vez en Galicia Blizzard Hunter, un dos grupos máis destacados do metal sudamericano, que recala en Sarria como parte da súa xira europea de 2025. Con actuacións xa confirmadas en países como Francia, Alemaña, Luxemburgo e Polonia, a banda chega con intención de deixar pegada cun directo demoledor, marcado pola potencia do seu son, a destreza técnica dos seus integrantes e unha actitude sobre o escenario que arrasa con todo.
Completa o cartel a formación madrileña Hungry for Hell, unha homenaxe fiel e visceral a Dio, un dos nomes imprescindibles na historia do rock e do metal. A súa proposta vai moito máis alá dunha simple recreación: é unha homenaxe sentida, traballada ata o mínimo detalle, que consegue captar a esencia e a forza dun mito musical cuxa influencia segue viva en milleiros de seguidores.
Será unha noite feita á medida de quen entende o rock como un xeito de vida, de quen busca guitarras afiadas, voces desgarradas e unha conexión directa entre o escenario e a emoción do público.