O Campo de Golf El Pilar de Sarria acolleu a primeira proba do Ranking Galego de Pitch&Putt 2025
O Campo de Golf El Pilar de Sarria acolleu a primeira proba do Ranking Galego de Pitch&Putt 2025, organizado pola Federación Galega de Golf. O evento contou cunha gran participación, rexistrando un total de 92 xogadores inscritos.
Na categoría scratch, o campión foi o coruñés Hugo Carro, quen logrou unha destacada actuación cun resultado de 50 golpes brutos (-4). Na categoría hándicap, o triunfo foi para o novo xogador benxamín Martín Gancedo, cun resultado de 49 golpes netos (-5).
O Ranking Galego de Pitch&Putt consta dun total de sete probas, cada unha delas celebrada nun campo diferente de Galicia e a competición concluirá o 1 de xuño na Coruña. Ao finalizar o circuíto, os catro mellores xogadores do ranking representarán a Galicia no Campionato de España de Federacións Autonómicas de Pitch&Putt, formando parte da selección galega.
Con este exitoso inicio en Sarria, a competición promete ser un gran atractivo para os afeccionados a este deporte en Galicia, consolidando o Pitch&Putt como unha modalidade en crecemento dentro do golf galego.