O CEIP do Páramo impulsa un proxecto de formación musical da man do profesor Toni
O CEIP Plurilingüe do Páramo vén de poñer en marcha un innovador proxecto de formación instrumental dirixido ao alumnado de Educación Primaria, integrado de maneira oficial dentro do currículo escolar.
Trátase dunha iniciativa pioneira na provincia de Lugo e, probablemente, tamén no conxunto do Estado, ao incorporar o aprendizaxe de instrumentos de vento metal —trompeta, trompa, bombardino e trombón— desde o segundo ciclo de Primaria.
Aínda que existen centros en España que desenvolven programas semellantes en ESO ou en sexto de Primaria, non se teñen referencias de experiencias consolidadas que comecen a unha idade tan temperá, o que converte esta proposta nun proxecto singular e innovador.
Este proxecto nace coa vontade de achegar a música a todos os nenos e nenas, demostrando que a integración natural da formación musical na escola enriquece o aprendizaxe e fortalece a comunidade educativa.
A idea inicial e todo o deseño pedagóxico leven a sinatura de Antonio Ibáñez, Toni, mestre de Educación Musical e titulado superior en trompeta, cunha ampla traxectoria no ámbito educativo e artístico. El é o promotor da iniciativa e o responsable de elaborar o material curricular necesario para integrala no marco oficial de Primaria, adaptando contidos, metodoloxías e secuencias didácticas para que o alumnado poida iniciarse no estudo dun instrumento de vento metal desde idades temperás.
Todos os mércores ofrécese tamén unha actividade gratuíta de formación instrumental, impartida polo propio Toni, auténtico motor e alma deste proxecto. A súa implicación, xunto co respaldo do equipo directivo e das familias, está a ser clave para o crecemento e consolidación da iniciativa dentro da comunidade educativa.
O proxecto conta tamén co apoio decidido do director do centro, Manuel Rodríguez, Manolo, cuxa implicación foi determinante. A súa disposición para facilitar todos os trámites e recursos permitiu adquirir o instrumental preciso, garantindo que a proposta comezase cunha base sólida e totalmente equipada desde o primeiro día.
Esta iniciativa desenvólvese cunha metodoloxía propia, concibida para ser accesible, sostible e inclusiva. Fronte aos custosos programas comerciais ofrecidos por algunhas marcas especializadas, o CEIP Plurilingüe do Páramo aposta por un modelo educativo propio que prioriza a calidade e a viabilidade económica. O centro anima, ademais, a que outros colexios que estean a desenvolver experiencias similares establezan contacto para compartir coñecementos e crear sinerxías de futuro.
OS BENEFICIOS
Entre os beneficios máis destacados atópanse o fomento do traballo en equipo, a convivencia e a responsabilidade compartida; a creación dunha alternativa saudable fronte ao uso excesivo das pantallas; o enriquecemento cultural e artístico; e o impulso do desenvolvemento cognitivo e emocional, mellorando a memoria, a coordinación, a creatividade e a autoestima.
A formación musical en idades temperás está amplamente recoñecida polo seu impacto positivo no desenvolvemento integral do alumnado.
Como colofón a estes primeiros meses de traballo, a recentemente creada agrupación instrumental do centro realizará o seu debut no Festival de Nadal do CEIP Plurilingüe do Páramo, unha cita moi agardada polo alumnado e as familias.