O Clube de Pesca Río Neira levou a cabo a segunda xornada de limpeza no río Neira
Este pasado sábado, o Clube de Pesca Río Neira levou a cabo a segunda xornada de limpeza no río Neira, unha iniciativa que forma parte do seu compromiso coa conservación dos ríos e a promoción da pesca sen morte.
Durante esta xornada, os voluntarios do club encargáronse de desbrozar os accesos, retirar ramas que dificultaban a pesca e, unha vez máis, retiraron unha gran cantidade de plásticos do cauce do río.
A pesar do esforzo continuo do club, "resulta incomprensible que o río siga sendo un vertedoiro para estes residuos, como demostra a gran cantidade de lixo retirado", explican.
Este domingo, 16 de marzo, comeza a tempada de pesca, e desde o club faise un chamamento á concienciación de todos os pescadores para que respecten o entorno natural e contribúan á súa conservación.
O Clube de Pesca Río Neira, que aposta por unha pesca responsable e respectuosa co medio ambiente, deséxalles a todos os pescadores unha excelente tempada.