O Concello de Sarria defende a xestión do gasto no alumeado de Nadal por "responsabilidade"
O Concello de Sarria defende que a decisión de axustar o gasto do alumeado de Nadal responde a un criterio de responsabilidade na xestión dos recursos públicos e á necesidade de cumprir o plan económico–financeiro vixente. O Goberno local explica que a redución duns vinte mil euros nesta partida permite actuar con coherencia nun momento no que varios servizos municipais atravesan unha situación complexa.
A iluminación instalouse unicamente nos espazos máis representativos da vila, como os principais cruzamentos e accesos, co obxectivo de manter o ambiente propio destas datas pero evitando gastos considerados non prioritarios. Desde o executivo aseguran que a decisión non se vincula a ter máis ou menos elementos decorativos, senón a actuar con sentido común e a priorizar o que é esencial para o correcto funcionamento do municipio.
O equipo de goberno subliña que o propósito é garantir unha xestión equilibrada e solvente ao longo de todo o ano, protexendo primeiro os servizos obrigatorios. Por este motivo, optouse por un modelo de iluminación suficiente e coidado, axustado á realidade económica actual.
O executivo insiste en que Sarria contará cun Nadal visible e con actividade, pero que tamén é preciso adoptar medidas responsables para preservar a estabilidade municipal.
SERVIZOS DEFICITARIOS
O Concello lembra que varios servizos presentan déficits significativos debido á falta de actualización das súas ordenanzas.
Entre eles, sitúanse a residencia municipal, cun desequilibrio económico elevado que afecta de maneira continua ás contas xerais; o servizo de recollida do lixo, cun contrato caducado desde hai cinco anos e cunhas taxas conxeladas desde 2014; e o matadoiro municipal, que tamén acumula perdas pola ausencia de revisión normativa.
Outros servizos municipais enfróntanse igualmente á necesidade de actualizar prezos públicos e taxas para cumprir coa lei e cubrir custos reais. A falta de ingresos suficientes obriga a establecer prioridades, razón pola que se decidiu intervir nunha partida non esencial como é a iluminación de Nadal.
A pesar do axuste, o Concello anuncia un programa festivo amplo e participativo, centrado nas persoas e na dinamización da vila. Entre as propostas previstas figura unha carpa de circo infantil na Praza da Vila, que ofrecerá actividades diarias pensadas para proporcionar alternativas de lecer continuado ás familias.
A programación cultural e social manterá un ritmo constante durante todas as festas e incluirá dúas cabalgatas de gran formato, a de Papá Noel e a dos Reis Magos, organizadas en colaboración co tecido asociativo e deportivo do municipio.
O executivo conclúe que Sarria terá un Nadal vivo, con ilusión e actividade permanente, cunha aposta clara pola participación, pola cultura e pola infancia, como elementos que maior impacto teñen na veciñanza.