O Concello do Incio repartirá 25 composteiros domésticos
![miniatura composteiros domésticos](https://sarriaxa.com/wp-content/uploads/2021/03/miniatura-composteiros-domesticos.jpg)
O Concello do Incio vén de adherirse ao programa de compostaxe doméstica de Sogama, a través do cal repartirá nos vindeiros días un lote de 25 composteiros individuais aos veciños e veciñas que así o soliciten, de xeito totalmente gratuíto.
Os composteiros teñen uns 300 litros de capacidade e poden instalarse no exterior das vivendas ou nas eiras anexas. Entréganse acompañados dun pequeno manual de instrucións no que se explica cómo realizar o proceso da compostaxe de xeito correcto.
O goberno local do Incio considera que a compostaxe é "parte da solución para contribuír á redución da pegada medioambiental, mellorar a nosa contorna e reducir a factura do lixo". Lembran que son residuos que non van producir contaminación e que se van aproveitar para xerar enriquecemento do solo dentro da propia vivenda. O proceso é limpo, non produce cheiros e non necesita mantemento.
Con esta técnica, ademais da obtención de compost, conséguense importantes beneficios ambientais e económicos, tendo en conta que os concellos poden ver reducida a frecuencia de recollida do lixo convencional, así como o importe da factura que deben pagar a Sogama pola xestión e tratamento da bolsa negra.
As persoas interesadas en facerse cun destes colectores domésticos poden solicitalo no Concello do Incio en horario de oficina chamando ao teléfono 982 42 70 14.
![composteiro doméstico](https://sarriaxa.com/wp-content/uploads/thumbs/2021/03/composteiro-domestico-200x229.jpg)