O Consorcio de Bombeiros aproba un orzamento de máis de 10 millóns de euros para 2026
O Pleno do Consorcio Provincial de Lugo para a prestación do Servizo contra Incendios e Salvamento deu luz verde ao orzamento do ano 2026, que superará os 10 millóns de euros.
Na sesión participaron o presidente da Deputación e do propio Consorcio, José Tomé Roca, representantes da Xunta de Galicia e membros dos distintos concellos implicados, que acordaron que tanto a Deputación de Lugo como a Administración autonómica destinen 4,3 millóns de euros cada unha ao ente provincial. O importe restante, que rolda 1,4 millóns de euros, procederá da contribución da asociación que agrupa ás aseguradoras en España, UNESPA.
O incremento das achegas, que roza o 30% respecto ao exercicio actual, permitirá facer fronte ás obrigas derivadas do convenio colectivo pactado a principios de ano co cadro de persoal. Ademais, o Pleno aprobou a regulación das axudas sociais destinadas aos profesionais que operan nos parques de Monforte de Lemos, Chantada, Sarria, Barreiros, Vilalba e Viveiro, tal e como se recolle no acordo alcanzado cos traballadores e traballadoras.
Entre as melloras acordadas no mes de xaneiro figuran a incorporación de 26 novos efectivos, que se sumarán aos 117 actuais, un incremento anual de 6.000 euros no salario da categoría de bombeiro e a redución de 158 horas anuais na xornada laboral, ata situarse nas 1.642 horas. Así mesmo, en setembro aprobouse unha achega próxima aos 2 millóns de euros destinada a modernizar os seis parques da provincia e asumir o custo das melloras laborais pactadas.