O deporte da provincia únese contra o cancro lucindo o Brazalete da Esperanza
O deporte únese na provincia de Lugo para impulsar unha atención máis humana e integral ás persoas con cancro a través da iniciativa Brazaletes de Esperanza, que se desenvolverá durante as xornadas de fin de semana do 30 de xaneiro e do 6 de febreiro. Deportistas de múltiples disciplinas e competicións sairán ao campo cun brazalete verde no brazo, un símbolo de apoio, visibilidade e compromiso coas necesidades das persoas enfermas e das súas familias.
A acción, promovida pola Asociación Española Contra o Cancro, chega este ano á súa terceira edición baixo o lema “O símbolo que nos une” e busca converter o brazalete verde nun emblema recoñecible de esperanza fronte á enfermidade. A cinta, similar á que tradicionalmente se emprega nos momentos de loito pero de cor verde, representa a solidariedade colectiva e a presenza do cancro en todos os ámbitos da sociedade.
Na iniciativa participan xogadores e xogadoras de competicións estatais como LALIGA EA SPORTS, HYPERMOTION, GENUINE Moeve, Liga F Moeve, Endesa ACB ou a Liga NEXUS Enerxía ASOBAL, así como equipos pertencentes ás federacións españolas de fútbol, baloncesto, balonmán, rugby, hóckey e voleibol. En Galicia, a campaña conta tamén co respaldo de diversas federacións autonómicas e do Clúster Galego da Industria do Deporte e o Benestar.
A provincia de Lugo terá unha ampla representación nesta acción solidaria. Durante a fin de semana do 30 de xaneiro sumaranse numerosos clubs de fútbol, fútbol sala, baloncesto, voleibol e atletismo de toda a xeografía provincial, mentres que na fin de semana do 6 de febreiro será a quenda doutros equipos destacados, incluídos conxuntos de referencia no deporte galego. A elevada participación confirma, segundo a Asociación, a excelente acollida da iniciativa no territorio lucense.
Esta mobilización coincide coa celebración do Día Mundial contra o Cancro, o vindeiro 4 de febreiro. Nesa data, a Asociación Española Contra o Cancro presentará o seu modelo de atención integral, elaborado a partir das prioridades sinaladas por pacientes oncolóxicos e familiares para recibir un trato máis próximo, humano e continuado ao longo do proceso da enfermidade.
Co obxectivo de dar resposta a estas demandas, a entidade reforzou a súa carteira de servizos gratuítos, orientados tanto ao acompañamento emocional como ao apoio social e práctico. A través de Brazaletes de Esperanza, a Asociación quere facer do deporte un altofalante colectivo que lembre que a loita contra o cancro é unha responsabilidade compartida por toda a sociedade.
OS PARTICIPANTES
Na provincia de Lugo, os clubs que se sumarán á iniciativa esta fin de semana son o Club Deportivo Lugo, Club Voleibol Arenal Emeve, Burela Futbol Sala Masculino, SD Sarriana, Racing Club Villalbés, Club Lemos, SD Guitiriz, Viveiro CF, CD Foz, Spórting Pontenova, Riotorto CF, CD Alfoz, SCD Milagrosa, SD Chantada, CP Calasancio, Club Atlético Escairón, Taboada CF, SD Outeiro de Rei, SD Pol, CD Sober, ACD Piringalla, CP Casás, SD O Páramo, Sociedad Gimnástica Lucense, Club Estudiantes Lugo, CP Casás Lugo, ADC Fonte de Rei, Fútbol Sala Meigallos, Club Baloncesto Sarria, Club Baloncesto Vila de Meira, Club Voleibol Ribeira Sacra, Club Voleibol deportivo San Ciprián e Club Muralla Volei.
Para a próxima fin de semana está prevista a participación do Club Baloncesto Breogán, FSF Castro, Ensino Lugo, Burela Fútbol Sala Femenino, Club Lemos, Ribadeo FC, Taboada CF, ACD Xermade, Burela SD, Portomarín CF, Quiroga FC, Club Atlético Chantada, Chantada SD, Monterroso SD, SD Pol, SD Antas, CD Corgo, CD Foz, UD Xove Lago, Asociación Deportiva y Cultural Monte Forte femenino, Carballedo CF, Club Quiroga Volei, Club Deportivo Korbis e Xabaríns Volei Club.