Deportes

Os de Sarria gañaran contra o CD Corgo no partido de ida 3-1, polo que o resultado en táboas serviulles para ascender

O equipo sénior B da SD Sarriana vén de ascender despois de empatar contra o CD Corgo no partido de volta, no campo do Corgo, e ter gañado na ida 3-1 no seu campo.

Con este éxito, os de Sarria pasan a Segunda Galicia, o que era o seu obxectivo durante toda a tempada. O seu adestrador, Raúl Fernández, sostivo que “a intención era ascender de maneira directa, pero non puido ser, xa que son rapaces novos que aínda teñen cousas que mellorar e ademais esta tempada tivo moito nivel. Pero conseguimos ascender e iso é co que nos quedamos".

A pesar da felicidade por conseguir o ascenso e o acompañamento da afección, o final do partido estivo marcado por certos comportamentos violentos no campo, no que houbo enfrontamentos entre deportistas, o que empañou en certa medida o logro acadado.

Agora, miran cara o futuro co pensamento de manterse na categoría durante a vindeira tempada e seguir mellorando para ir escalando tanto deportiva como a nivel persoal.