O grupo de Kung Fu da Anpa do CPI Ramón Piñeiro organizou unha xornada de primeiros auxilios
O grupo de Kung Fu da Anpa do CPI Ramón Piñeiro organizou unha xornada destinada á aprendizaxe e familiarización de conceptos básicos de técnicas de primeiros auxilios para as nenas e nenos da actividade Kung Fu, coa participación activa e conxunta das súas nais e pais.
O obradoiro abordou aspectos fundamentais como a conduta PAS (Protexer Alertar Socorrer), as manobras do ABC en primeiros auxilios, como a manobra fronte-queixo para a apertura das vías aéreas, actuación en caso de avulsión de peza dental durante práctica de actividade físico-deportiva, atención a persoas con perda da consciencia por diferentes causas, a manobra de Heimlich para o caso de obstrución da vía aérea por corpo estraño, principais posicións de seguridade e espera segundo cada caso e, finalmente, prácticas de reanimación cardiopulmonar básica.
Mediante os exercicios prácticos por equipos, a rapazada e as familias puideron interiorizar que, por veces, a distancia entre a vida e a morte é do grosor dun papel de arroz e que poder valorar e actuar axeitadamente nunha situación de emerxencia pode decidir o destino dunha persoa.
"Os talleres de primeiros auxilios deberan de recibir máis importancia da que reciben e realizarse con máis frecuencia e en máis ámbitos, colexios, institutos, asociacións culturais... do que se realizan", sosteñen desde o grupo.
Ademais, engaden que no eido do Kung Fu, a arte marcial aspira a afondar no estudo do corpo humano, do seu movemento para a defensa persoal, onde a praxe marcial non é unha violencia senón unha acción de amor pola vida e de protección da mesma. 2E por iso, os primeiros auxilios gardan un especial nexo ca natureza propia das artes marciais", conclúen.