O Grupo Xacobeo Sarria organiza unha nova ruta pola Vía da Prata entre Tamallancos e Arenteiro
O Grupo Xacobeo Sarria organiza para o vindeiro 1 de febreiro unha nova actividade incluída no programa Percorrendo Galicia, centrada nesta ocasión nun tramo da Vía da Prata entre Tamallancos e Arenteiro. Trátase dunha etapa de 16 quilómetros, catalogada como de dificultade media, que discorre por paraxes naturais das terras ourensás e que forma parte do Camiño de Santiago.
A xornada inclúe unha comida de grupo ao mediodía no Carballiño e conta con servizo de transporte, comida e seguros. A saída realizarase ás 7:30 horas desde Lugo e ás 8:00 horas desde Sarria, facilitando a participación de persoas procedentes de distintos puntos da provincia.
O prazo de reserva de praza permanecerá aberto ata o 29 de xaneiro e as prazas son limitadas. O prezo da actividade é de 47 euros para as persoas socias e de 50 euros para as non socias. As persoas interesadas poden solicitar máis información ou formalizar a inscrición a través do teléfono 609 027 518.
A iniciativa está organizada pola Asociación Grupo Xacobeo Sarria e conta coa colaboración da Deputación de Lugo, da área de Cultura da Vicepresidencia e da Axencia de Turismo de Galicia.