O IES Gregorio Fernández logra o selo National Quality Label polo seu proxecto eTwinning
O IES Gregorio Fernández vén de ser distinguido co selo National Quality Label polo proxecto eTwinning titulado Hidden traces of history behind the stones!, unha iniciativa educativa de carácter internacional que puxo en valor o traballo colaborativo e a innovación pedagóxica do alumnado e do profesorado implicado.
O recoñecemento foi outorgado polo Servizo Nacional de Apoio eTwinning España, dependente do Ministerio de Educación, que xa remitiu ao centro os diplomas acreditativos e os agasallos asociados a esta distinción. Desde o instituto trasladaron os seus parabéns a todas as persoas participantes no proxecto, destacando o esforzo colectivo que fixo posible acadar esta certificación de calidade a nivel estatal.
Este novo logro supón un paso máis na estratexia de internacionalización do centro, que continúa reforzando a súa presenza en programas europeos e iniciativas de cooperación educativa. Entre os plans de futuro atópanse a posibilidade de contar cunha embaixadora eTwinning, acadar a acreditación como Escola eTwinning e seguir ampliando destinos para mobilidades Erasmus.
Ademais, o instituto xa está a desenvolver un novo proxecto eTwinning ao longo deste ano e traballa na ampliación do número de iniciativas deste tipo para o vindeiro curso, co obxectivo de consolidar e fortalecer a dimensión europea da súa oferta educativa.