O II Festival de Bandas Comarca de Sarria foi todo un éxito
Sarria viviu unha xornada marcada pola música de banda coa celebración do II Festival de Bandas Comarca de Sarria, evento integrado na I Semana da Banda impulsada pola Banda de Música da Comarca de Sarria (BMCS).
Tanto os pasarrúas previos como o concerto na Praza da Vila reuniron a un público numeroso, consolidando a proposta musical como parte do calendario cultural local.
A Banda de Música de Chantada, convidada nesta ocasión, deixou patente a súa experiencia interpretando un repertorio variado que combinou pezas de autoría galega, como o pasodobre Marcos Areán de Javier Borrajo, a danza Festa na Tolda de Gustavo Freire ou a icónica Muiñeira de Chantada dos irmáns Fernández, con obras internacionais como un extracto de Coppelia de Léo Delibes ou as Danzas cubanas de Robert Sheldon.
Pola súa parte, a BMCS apostou por un programa cun equilibrio similar, ofrecendo o pasodobre Musical Apolo de Amando Blanquer Ponsoda e a obertura Alvamar de James Barnes como representación foránea, e mantendo a identidade galega con pezas como Fantasía sobre tres temas galegos de Simón Couceiro, Muiñeira dos Pendellos de Juan Lois Diéguez e o Himno de Sarria, composto por Carmela González, Enrique García Rey e Manuel Montero López. A interpretación deste último contou coa participación da cantante local Ana Miranda, que puxo voz á letra do himno.
Desde a BMCS subliñan que o obxectivo deste evento é dobre: por unha banda, enriquecer a oferta musical da localidade achegando agrupacións doutros puntos de Galicia, e por outra, aprender da experiencia destas bandas para seguir mellorando a calidade da súa formación.
Como colofón, a Banda de Música de Chantada convidou á BMCS a actuar no XXXIV Festival de Bandas de Música de Chantada, previsto para o 24 de agosto, un xesto que reforza os lazos entre ambas agrupacións e permitirá que a música sarriá siga espallándose por outras localidades galegas.