O II Obradoiro de Dirección de Banda da BMCS terá lugar no Páramo
O II Obradoiro de Dirección de Banda organizado pola Banda de Música da Comarca de Sarria desenvolverase durante a fin de semana do 31 de xaneiro e 1 de febreiro nas instalacións do CEIP Plurilingüe do Páramo, cunha proposta formativa centrada na mellora técnica dos directores e no reforzo da relación comunicativa entre quen dirixe e quen interpreta. O curso estrutúrase en dúas xornadas cun obxectivo dobre, orientado a perfeccionar a preparación de directores profesionais e a traballar a interacción directa cos músicos como elemento clave para o bo funcionamento dunha banda.
As sesións alternarán contidos teóricos dirixidos aos directores e impartidos por David Fiuza con períodos prácticos nos que a banda servirá como espazo real para poñer en práctica os coñecementos adquiridos. Nestas prácticas tamén se ofrecerá a posibilidade de que algúns músicos collan a batuta por primeira vez, como unha iniciación ás artes da dirección, favorecendo así unha visión máis ampla e compartida do proceso musical.
Un dos piares fundamentais do obradoiro é afondar na comunicación entre os dous elementos esenciais dunha banda de música, o director e os músicos, entendida tanto desde o punto de vista técnico como emocional. Dende a organización destacan que unha comunicación fluída entre ambas partes resulta imprescindible para acadar un entendemento sólido que se traduza nun traballo conxunto eficaz e nun mellor resultado artístico da agrupación.
O repertorio seleccionado para o curso inclúe obras como Música y vinos, de Manuel Morales Martínez; A viaxe de Teucro, de Carlos Rodríguez Torres; A Lenda de Montelongo, de Bernardo del Río; Music for a Festival, de Philip Sparke; Elsa’s Procession to the Cathedral, da ópera Lohengrin de Richard Wagner, con arranxo de L. Cailliet; e October, de Eric Whitacre. A elección destas pezas supón un incremento da dificultade habitual do repertorio da BMCS, co propósito de achegar ao público obras de maior complexidade ao longo da tempada e continuar avanzando no percorrido musical da banda.
A celebración deste obradoiro é posible grazas á colaboración do Concello do Páramo e, de xeito especial, do CEIP Plurilingüe do Páramo, que cede as súas instalacións para facer posible a actividade. O impulso e a promoción da música entre a veciñanza da comarca de Sarria constitúe un dos principios fundacionais da BMCS, cunha atención especial aos máis novos.
Neste contexto, os alumnos de música do colexio do Páramo participarán como convidados xunto co seu profesor Antonio Ibáñez, trompetista da banda, para coñecer de primeira man como soa unha banda de música e como se desenvolve internamente un ensaio, sendo para eles a súa primeira experiencia deste tipo. Dende a directiva da BMCS expresan a súa satisfacción por achegar este tipo de iniciativas aos nenos do rural e salientan o valor que supón poder ver traballar a un dos directores máis destacados de Galicia a poucos metros das súas casas.