O Incio acollerá en agosto a segunda edición do seu campus de fútbol dirixido a nenos e nenas
O campo municipal de Carboeiro, no Concello do Incio, será o escenario da segunda edición do campus de fútbol organizado polo club O Incio CF, que terá lugar do 4 ao 8 de agosto en horario de mañá, entre as 10:00 e as 14:00 horas.
A actividade está dirixida a rapaces e rapazas de entre 6 e 16 anos e contará con prazas limitadas, cun máximo de 20 participantes e un mínimo necesario de 10 inscricións para que se leve a cabo. O prazo límite para anotarse remata o 25 de xullo.
O prezo do campus é de 75 euros e inclúe formación deportiva a cargo dun adestrador titulado, equipamento deportivo, seguro, almorzo a media mañá (que consistirá en bocadillo e froita), diploma acreditativo e un agasallo do club organizador. Trátase dun campus mixto que busca fomentar o deporte base no municipio.
A actividade estará dirixida por Felipe Varela Fernández, adestrador titulado de nivel 3 con experiencia en categorías inferiores, actualmente vinculado ao Milagrosa. As persoas interesadas poden obter máis información ou formalizar a súa inscrición a través do teléfono 654 652 346.