O Incio avanza na rehabilitación da Casona coa axuda da Deputación de Lugo
O Goberno municipal do Incio conseguiu un avance significativo tras lograr o compromiso do Pleno para que a Deputación de Lugo destine 250.000 euros á rehabilitación da Casona.
A Corporación deu o seu acordo unánime á moción presentada polos socialistas, que incluía unha emenda do equipo de Goberno na que se solicita á Deputación a achega dos fondos prometidos dende 2015.
A iniciativa proposta polos socialistas incluía a reclamación da cesión da Casona da Cruz do Incio, ofrecida pola Deputación de Lugo, actual propietaria do inmoble, así como a petición de fondos adicionais a outras administracións para a súa rehabilitación.
Durante o Pleno extraordinario celebrado, o Goberno local introduciu unha emenda á proposta orixinal que foi aprobada por unanimidade, e que será trasladada á institución provincial para asegurar que se cumpra co acordo.
Este proceso baséase nunha visita previa dos membros da Deputación ao Concello do Incio en 2015, onde se manifestou que "ese mesmo ano" comezarían as obras de remodelación coa devandita contía de 250.000 euros.
O alcalde do Incio, Héctor Corujo, destacou que a aceptación da cesión do inmoble permitirá recuperar o polígono afectado pola propiedade, ademais de asumir a responsabilidade dun proxecto con uso social. Demandou ademais que a Deputación de Lugo cumpra coa súa parte do acordo mediante a transferencia dos fondos.
Corujo engadiu: "Agora temos un acordo firme do Pleno que así o demanda, polo que agardamos que nesta ocasión a institución provincial e os socialistas cumpran co acordado e non quede en papel mollado, como nas anteriores ocasións".