O Incio contará cunha nova área recreativa no Muíño do Sancho, en Trascastro
O Concello do Incio contará cunha nova área recreativa no Muíño do Sancho, situado en Trascastro. Os traballos de acondicionamento da zona están a ser levados a cabo polo alumnado do obradoiro de emprego A Pobra do Brollón, O Incio e Bóveda.
A actuación realizarase en dúas fases. Na primeira delas, o alumnado está a traballar na marxe dereita do río Cabe, onde se procedeu á limpeza, retirada e queima da broza acumulada. Ademais, plantáronse varias árbores autóctonas e fixéronse un macizo de arándanos e unha rocalla de plantas aromáticas.
A intervención tamén inclúe a instalación de varias mesas, que permitirán habilitar unha pequena área recreativa e de descanso para os veciños e visitantes.
A segunda fase, que dará comezo nas vindeiras semanas, consistirá no reposición dunha antiga ponte que atravesa o río, que será substituída por unha pasarela de madeira.
Estímase que todos os traballos estean finalizados para o verán, permitindo así que a veciñanza e os turistas poidan disfrutar desta nova zona de ocio e recreo no corazón do Concello do Incio.