O Paradela e o Oural únicos clasificados da comarca de Sarria para loitar polo ascenso
Os equipos de Segunda Galicia remataron a fin de semana pasada a primeira fase da liga. Os enfrontamentos deixaron como resultado os equipos clasificados para loitar por xogar na primeira categoría na vindeira temporada. A esta segunda fase da liga pasaban os catro primeiros postos de cada grupo. Desta forma, no 2A son o Becerreá, o Paradela, o Milagrosa e o Antas. Quedando ás portas o Páramo que empatou a puntos co último clasificado.
Por outra banda, no grupo 2B, os clasificados foron o Ferreira, o Oural o Chantada B e o Río Sil. Nesta ocasión, o Incio quedou de quinto na táboa e seguirá un ano máis en Segunda Galicia.
Para o comezo desta segunda fase, estableceuse un sistema de puntos co fin de outorgarlle certa vantaxe a aqueles grupos que conseguiron un posto máis elevado na clasificación. Desta forma o Becerreá e o Ferreira comezan con 5 puntos, o Paradela e o Oural con 3, o Milagrosa e o Chantada B con 2 e o Antas e o Río sil con 1.
A competición continuará o fin de semana do 19 e 20 de marzo ao tomar este como descanso. Así, o Becerreá xogará contra o Río Sil, o Paradela contra o Oural, o Antas contra o Ferreira e o Milagrosa contra o Chantada B.