O Páramo organiza o seu programa de viaxes á praia para o verán 2025
O Concello do Páramo xa ten todo preparado para ofrecer un verán diferente e refrescante á súa veciñanza. A través dun programa especial de viaxes á praia, a administración local promoverá saídas en autobús cada mércores dos meses de xullo e agosto, con destinos como Foz, Miño, Tapia de Casariego ou Pontedeume.
A primeira das oito excursións programadas terá lugar o 2 de xullo con destino a Foz, e o calendario esténdese ata o 27 de agosto, cunha nova visita a esta mesma localidade costeira para pechar o ciclo. A saída será sempre ás 9:00 horas desde o Campo da Feira do Páramo, xunto á Casa Amelia, e está aberta tanto a persoas empadroadas como non empadroadas, con tarifas que varían en función da idade e da residencia.
O prezo das viaxes para empadroados vai desde a gratuidade para nenos de ata 3 anos, ata os 7 euros para maiores de 10 anos. No caso das persoas non empadroadas, as tarifas sitúanse entre os 7 e os 12 euros. A inscrición deberá formalizarse como moi tarde o día anterior a cada saída antes das 13:00 horas.
A ruta contempla praias de interese tanto en Galicia como en Asturias, como Covas (Viveiro), Torno (San Cibrao), Ares (Ferrol), San Miguel de Reinante ou Tapia de Casariego. Como medida organizativa, non se reservará praza sen pago previo, e o autobús só circulará se se acada un mínimo de 20 persoas inscritas. Ademais, non se admitirán reservas fóra das datas e procedementos establecidos.
A iniciativa, cofinanciada polo Concello, busca ofrecer unha alternativa de lecer accesible e compartida para todos os públicos, especialmente para aquelas persoas que non dispoñen de medios propios para se desprazar á costa.