O pavillón de Oural mellorou a súa eficiencia enerxética cun investimento de 60.000 euros
A Xunta de Galicia destinou 60.000 euros á mellora da eficiencia enerxética e do confort do pavillón deportivo de Oural, en Sarria, mediante unha achega adicional ao Fondo de Cooperación Local, que xestiona a Consellería de Presidencia, Xustiza e Deportes.
O delegado territorial de Lugo, Javier Arias, visitou as instalacións para comprobar o resultado dos traballos. Na zona dos vestiarios substituíuse a cuberta de chapa galvanizada sinxela por outra de panel sándwich de 30 mm de espesor. Ademais, realizáronse labores de limpeza, selado e impermeabilización nas carpinterías exteriores do pavillón.
O Concello de Sarria obtivo o importe máximo da axuda para estas obras, que reforzaron o illamento térmico das instalacións e contribuíron a reducir o consumo enerxético, as emisións contaminantes e os custos de mantemento, explicou Arias.
O Fondo de Cooperación Local é o instrumento central de colaboración financeira da Xunta de Galicia coas entidades locais e inclúe, entre outras liñas, un fondo adicional destinado a concellos con menos de 15.000 habitantes para obras de mellora da eficiencia enerxética en edificios municipais utilizados para a prestación de servizos ou o exercicio das súas competencias.