O PP de Samos apunta que hai árbores que dificultan o paso na aldea de Frollais
O voceiro do PP de Samos, Miguel Gallego, denuncia que “dende fai uns días hai árbores caídas nun camiño público da aldea de Frollais, que impiden o paso do gando e da maquinaria”.
Así, o voceiro di que, tralo aviso por parte dos veciños da zona ao Concello para que procedera a retirar as árbores, a alcaldesa sinalou que non sabía nada dese asunto e o concelleiro de Cultura e Deporte asegurou que o Concello non prestaba ese tipo de servizo.
A este respecto, Gallego pregúntase “para que hai un concelleiro de Medio Rural” ao entender que “debería ser el o que se ocupara destes asuntos”. Gallego lamenta que “o bipartito quite servizos que se viñan prestando aos veciños, que se amosan sorprendidos porque era o Concello o que se encargaba de retirar as árbores que dificultaban o paso por camiños municipais”.