O PP de Samos critica que o custo da Cea Anual de Hostalería fora pagada polo Concello
![Miguel-Gallego,-PP-Samos](https://sarriaxa.com/wp-content/uploads/2024/08/Miguel-Gallego-PP-Samos.jpeg)
O voceiro do PP de Samos, Miguel Gallego, advirte que “a alcaldesa, María Jesús López e o concelleiro de Cultura José Manuel Préstamo lle cargan ao Concello unha factura de 170 euros por dous menús dunha cea”, a correspondente á Cea Anual de Hostalería da comarca de Sarria, celebrada no mes de febreiro.
O popular considera “totalmente escandaloso o uso de fondos públicos neste tipo de actividades cando os membros do Goberno xa cobran dietas a final de ano”.
Así, din que a cea foi en febreiro, pero “pasan a factura agora en xullo” e a oposición “entérase desta factura pola documentación que levan ao pleno deste mes porque non facilitaron antes esa información”. Polo tanto, o voceiro do PP condena a “falta de transparencia” e sinala que “o bipartito incumpre sistematicamente a lei” neste sentido.
O Grupo Municipal do Partido Popular pedirá que se devolva ese diñeiro ás arcas municipais e que “a alcaldesa empece a pagar as festas do seu propio peto, que para iso cobra”, conclúe o portavoz.
Pola súa parte, a alcaldesa de Samos, Chus López, sostén que a Cea Anual de Hostalería da comarca de Sarria é "un acto institucional no que imos en representación do Concello de Samos". É máis, alude a que foron ela, como alcaldesa de Samos, e o concelleiro Préstamo, "non fomos coa nosa familia persoal, como é o caso do anterior alcalde e pai de Miguel Gallego, Julio Gallego, que foi a unha desas ceas coa súa muller", defende a rexedora.
Ademais, explica que desde a organización da cea se lle pediu ao Goberno local de Samos algún tipo de contribución para aportar á organización de dita cea e desde o Goberno local, tendo en conta os recursos dos que dispón, se decidiu pagar a cea das dúas persoas participantes, que representan ao Concello en dita cea, cos fondos do Concello, "como unha dieta máis e como unha forma de contribución á Cea Anual de Hostalería por parte do Concello de Samos", explica.
Así, a rexedora destaca que non só estiveron presentes eles, tamén estiveron representantes dos diferentes partidos políticos do Concello de Sarria, a alcaldesa de Triacastela, e moitos máis cargos representativos da política da comarca de Sarria, "xa que é un acto interesante de cara a mellorar as relacións e conseguir cousas boas para o municipio", conclúe.