O PP de Sarria reclama manter o tráfico rodado na contorna da Ponte Ribeira
O Grupo Municipal Popular de Sarria levará ao Pleno deste xoves unha moción coa que pretende frear a proposta da Confederación Hidrográfica Miño-Sil (CHMS) de peonalizar completamente a Ponte Ribeira e os seus accesos. Os populares solicitan á Confederación que estude solucións técnicas que permitan compatibilizar a posta en valor deste ben patrimonial co mantemento do tránsito de vehículos.
Segundo advirten desde o PP, o proxecto anunciado pola CHMS supón non só a peonalización da ponte, senón tamén do seu contorno inmediato, o que implicaría o corte definitivo dunha das conexións viarias máis utilizadas do municipio. “Non se contempla ningunha alternativa para garantir a continuidade da circulación, o que supón un grave problema para os veciños e para os negocios da zona”, sinalan.
A formación conservadora asegura que este cambio radical na mobilidade de Sarria afectaría negativamente ao tráfico noutras rúas do centro, especialmente en períodos como o escolar. Lembran que xa houbo problemas durante o tempo en que a ponte estivo cortada e se instalou unha pasarela provisional. “O impacto daquela situación foi evidente, e agora queren consolidalo sen ofrecer opcións viables nin abrir un proceso participativo coa cidadanía”, critican.
Desde o PP consideran que suprimir esta vía de comunicación estratéxica sen ofrecer alternativas viables supón un retroceso na vertebración da vila. “É unha decisión que compromete a mobilidade, a seguridade en casos de emerxencia, o acceso a zonas con potencial turístico e mesmo a vida cotiá dos veciños”, afirman. Ademais, lamentan que moitas persoas non fosen informadas de que o proxecto incluía a eliminación do uso rodado da ponte.
Por iso, a moción tamén insta ao goberno municipal a promover un verdadeiro proceso de participación veciñal e de información pública antes de autorizar calquera transformación substancial na configuración actual da contorna.
Os populares conclúen que a mobilidade urbana debe basearse nun equilibrio razoable entre a protección do patrimonio e as necesidades funcionais da poboación. “É posible conservar a Ponte Ribeira sen renunciar ao seu uso como vía de comunicación. Só fai falta vontade e diálogo para atopar solucións intelixentes e consensuadas”, rematan.