O PP de Sarria reclama un apoio firme aos autónomos "fronte á presión fiscal do Goberno central"
A moción do Grupo Municipal do Partido Popular de Sarria que levou ao pleno deste xoves sobre a defensa dos traballadores autónomos quedou sen aprobar nin rexeitar ao producirse un empate cos cinco votos a favor dos populares e os cinco en contra que sumaron PSOE e BNG, mentres que Camiña Sarria se abstivo por ser "unha cuestión nacional".
O PP quería que o Concello adoptase unha posición clara en apoio dun colectivo que, segundo denuncian, está a sufrir unha “carga impositiva e burocrática crecente” derivada das políticas do Goberno central. Os populares aseguran que esta situación está a frear o emprendemento e dificultando a creación de emprego no municipio.
A formación conservadora manifesta así o seu rexeitamento ás decisións fiscais do Executivo estatal, que —afirma— manteñen aos autónomos “baixo unha presión desproporcionada, que limita a iniciativa empresarial e resta dinamismo á economía local”. Pola súa banda, o PP lembra que continúa sen executarse unha parte dos compromisos asumidos polo Goberno en 2023, a pesar de seren medidas “imprescindibles para aliviar a situación do sector”.
Entre esas accións pendentes sitúan a aplicación do réxime de franquía do IVE recollido na Directiva europea 2020/285, cuxo prazo de adaptación rematou o 1 de xaneiro de 2025. A implantación deste sistema permitiría deixar exentos de presentar e pagar o imposto a autónomos e pequenas empresas cun volume anual inferior aos 85.000 euros, o que suporía un “alivio fiscal e administrativo de grande impacto”.
Os populares insisten en que “ningunha institución pode mirar para outro lado ante esta realidade” e subliñan que agora “non é o momento de penalizar ao tecido produtivo, senón de acompañalo e protexelo”. Así, cargan contra o Goberno de Pedro Sánchez por “impor unha presión fiscal asfixiante” e por “negar un alivio que Europa xa ten avalado”.