O PP de Sarria reclama un plan integral para rehabilitar O Chanto e recuperar a praia fluvial
O Grupo Municipal Popular de Sarria volve instar ao Concello a poñer en marcha un proxecto global para a recuperación de O Chanto, que inclúa a valorización da totalidade da contorna e da súa praia fluvial.
Os populares lembran que esta petición non é recente, xa que foi defendida en anteriores mandatos e tamén no actual, con dúas mocións aprobadas a proposta do Partido Popular, nas que se reclamaba unha rehabilitación integral do espazo e a posta en valor da zona de baño.
Con todo, sinalan que o executivo municipal segue sen cumprir eses acordos e prolonga a situación de abandono dun enclave central para Sarria, limitándose a anunciar actuacións illadas que non afrontan a necesidade real de devolver este espazo ao uso e gozo da veciñanza durante todo o ano.
A adquisición das novas parcelas no seu entorno supón, segundo o PP, unha oportunidade clara, mais subliñan que debe entenderse como parte dun plan máis ambicioso que dea prioridade á restauración completa de O Chanto, que continúa nun estado preocupante de deterioro: deficiente iluminación, elementos e lámpadas avariadas, pavimento desgastado e mesmo inexistente nalgúns puntos.
A formación popular defende un proxecto que contemple, de maneira imprescindible, a recuperación da praia fluvial, a rehabilitación do edificio municipal apuntalado desde 2020, a mellora do paseo, a reposición ou reparación das varandas, a substitución do mobiliario en mal estado e a posta en marcha dun plan de limpeza e mantemento continuado que garanta un entorno digno.
“O Chanto non pode seguir sendo un espazo degradado. A prioridade debe ser a súa recuperación integral, pois forma parte da memoria colectiva de Sarria”, destacou a portavoz, Carmen José López.
Así mesmo, os populares insisten en que “coidar O Chanto non é levar a cabo unha obra illada, senón recuperar un símbolo da vila e proxectalo cara ao futuro como lugar de encontro, lecer e recordo”. “Calquera intervención do Concello debe enmarcarse nun proxecto global, sostible e dirixido á posta en valor dun espazo esencial para a localidade”, engadiron os edís do PP.