O proxecto da Mancomunidade, 'Camiño Francés: Camiño 360º', recibe un millón de euros
O proxecto 'Camiño Francés: Camiño 360º' recibe o visto bo do Plan de Recuperación, Transformación e Resiliencia financiado pola Unión Europea NextGenerationEU a través do Ministerio de Comercio, Industria e Turismo, cunha dotación de un millón euros.
Á iniciativa, liderada pola Mancomunidade de Municipios Galegos do Camiño Francés, sumáronse catro concellos da Comarca do Bierzo; Camponaraya, Trabadelo, Veiga de Valcarce e Villafranca do Bierzo.
Os alcaldes e concelleiros dos quince concellos que a conforman, once galegos e catro leoneses, reuníronse en Triacastela, que ostenta a Presidencia da Mancomunidade, para explicar as actuacións que se levarán a cabo con este proxecto co obxectivo de reforzar o liderado do Camiño Francés ofrecendo máis e mellores servizos a través da innovación dixital e o turismo experiencial.
Olga Iglesias, presidenta da Mancomunidade de Municipios Galegos do Camiño Francés, destaca que "os quince concellos que forman parte deste proxecto propoñen combinar a ruta máis clásica cos recursos máis innovadores. O Camiño Francés do futuro manterá a súa esencia ancestral e os seus atractivos tradicionais, pero vivirase dun xeito máis intenso, dixital e accesible”.