O PSdeG reclama en Láncara un modelo público e profesionalizado contra os incendios forestais
O PSdeG reclamou en Láncara un cambio urxente e profundo no modelo de loita contra os incendios forestais, insistindo en que Galicia precisa dun servizo único, estable e profesionalizado de prevención e extinción dependente da Xunta, que poña fin á precariedade, á improvisación e ao abandono que sofren os concellos.
O alcalde en funcións de Láncara, Pablo Rivera, denunciou que no seu concello a brigada municipal tivo que renunciar por falta de recursos e que a carroceta só estivo dispoñible un día durante toda a vaga de lumes, “proba evidente de que o sistema actual non funciona nin está dimensionado para as necesidades reais”. Rivera advertiu que os concellos non poden seguir asumindo competencias que lle corresponden á Xunta e que non se pode lexislar dende Santiago para logo deixar sen medios ás administracións locais.
A secretaria de Organización do PSdeG, Lara Méndez, denunciou que o sistema das brigadas municipais é un parche precario, con contratos de catro ou cinco persoas durante só tres meses, coas arcas municipais encargadas de vehículos, seguros e equipos de protección. Criticou tamén a propaganda do PP, que publicou convocatorias de prazas que xa pertencían á oferta de 2023, sen dispoñibilidade real durante a tempada de risco.
Carmen Rodríguez Dacosta, portavoz do eido forestal do Grupo Parlamentario Socialista, destacou que mandar brigadistas con só 16 horas de formación fronte a incendios de quinta xeración é unha temeridade. Lamentou a caída das brigadas municipais de 263 en 2016 a 151 en 2023, mentres se presumen cifras irreais de efectivos. Engadiu que a Xunta descabeza as brigadas locais ao levar aos seus capataces para outras zonas, xerando improvisación, inseguridade e falta de respecto.
Tanto Rivera como as deputadas coincidiron en reclamar un corpo público propio, estable e profesional, con formación adecuada e medios suficientes durante todo o ano. Ao remate, enviaron palabras de ánimo aos brigadistas e traballadores forestais feridos, desexándolles unha pronta recuperación e recoñecendo o seu esforzo diario na loita contra o lume.