O Sarriana volve liderar trala vitoria desta fin de semana
Esta fin de semana serviu para celebrar os partidos aprazados nas xornadas anteriores debido a elevada incidencia da Covid 19 no grupo 2B de Segunda.
En Preferente, o Sarriana venceu 0-2 ao San Tirso, desta forma ponse líder de novo con 38 puntos. O encontro foi dominado polos lucenses no primeiro tempo, que foron quenes de converter un penalti en gol no minuto 33. Pouco despois, no 37, os sarriaos afianzaron o resultado co 0-2 que defenderon ata o final do encontro.
Na seguinte xornada, o Sarriana xogará contra o segundo na clasificación o Atl. Coruña Montañeros.
En Segunda Galicia o grupo 2A xogou a xornada que lle correspondía. Exceptuando o enfrontamento entre o SP Lucense e o Páramo que se suspendeu.
Por outra banda, o Paradela xogou contra o Antas e empatou a 1. O encontro estreou o marcador no minuto 9 co gol dos visitantes e, na metade da segunda parte, os locais lograron igualar o resultado que quedou en 1-1 ata o final. Sumar este punto na clasificación supúxolle ao Paradela o ascenso ata o segundo lugar da táboa.
No grupo 2B esta fin de semana serviu para xogar encontros aprazados.
O Oural perdeu pola mínima contra un Río Sil que non deixou perder nin unha oportunidade. O Río Sil púxose por diante no principio do encontro e, cando o Oural logrou igualar o marcador, soubo sacar vantaxe de novo. Chegaron ao descanso co marcador en 1-2 que pronto sumaría o 1-3, tras este gol, os sarriaos loitaron acadando o 2-3 e, a continuación o Río Sil afianzou resultado co 2-4 que se mantivo ata o minuto 90 no que os locais recortaron distancias co 2-3. Un marcador insuficiente para facerse co partido.
O Incio, pola súa parte, non lle deu tregua ao Quiroga na súa casa. Os de Sarria encaixaron o primeiro punto no minuto 2 do encontro. Dez minutos despois afianzaron co 0-2. Os locais intentaron achegarse co 1-2 do 18’ pero antes de chegar ao descanso os do Incio xa anotaran o 1-3 que defenderon ata o final do enfrontamento.
Estes partidos deixan ao Oural na terceira posición con 16 puntos e ao Incio na sexta con 12.