O vindeiro 8 de xuño celébrase a primeira KDD Shotsontheroad en Paradela
A Asociación de Mulleres de Paradela, conxuntamente cuns rapaces afeccionados ao motor do municipio paradelense, organizan este 8 de xuño a primeira edición da KDD Shotsontheroad, un encontro de vehículos no que participarán case 200 coches, que serán de diferente tipoloxía: clásicos, modernos e de tuning.
Así, os vehículos, que virán de todas partes da provincia de lugo, quedarán na explanada do mercado gandeiro desde as 11.30 horas do sábado e desfrutarán da xornada ata as 21.30 horas, cando tamén veciños e veciñas e outros interesados poderán achegarse a ver os distintos coches.
Ademais do motor, durante a xornada contarase con comida proveniente de foodtrucks e haberá sesión vermú e Dj, así como haberá sorteos entre os participantes e entregaranse recoñecementos ao vehículo máis antigo ou ao chegado desde o punto máis lonxano.