Obradoiros sobre a muller na ciencia, en Triacastela
O colexio público Eduardo Cela Vila de Triacastela acollerá a vindeira semana dous obradoiros sobre a muller e a nena na ciencia, coincidindo coa celebración deste día internacional.
Os obradoiros desenvolveranse o martes, día 9, e o alumnado poderá seguilos de xeito telemático. Entre as relatoras convidadas estará a veciña de Triacastela Carmela Cela, investigadora en inmunoloxía, que falará sobre a utilidade do sistema inmunitario.
A conmemoración do Día internacional da muller e a nena na ciencia, cada 11 de febreiro, convida á reflexión. A pesar de que a participación feminina nas carreiras de grao superior aumentou considerablemente co paso dos anos, a brecha de xénero nos sectores da ciencia, a tecnoloxía, a enxeñería e as matemáticas aínda persiste. Segundo datos da Real Academia da Enxeñería, no noso país, nos últimos anos, a demanda de titulacións técnicas caeu nun 33% en mulleres e nun 25% en homes. En titulacións como bioquímica ou agrónomos, a metade dos alumnos son mulleres, pero noutras carreiras, como industriais, aeronáutica ou minas, a porcentaxe cae ao 25 %.