Olga Capón, do PP de Láncara, mostrouse optimista tras reunirse co delegado territorial da Xunta
O delegado territorial da Xunta en Lugo, Javier Arias, reuniuse cos concelleiros de Láncara Miguel Losada e Olga Capón para tratar diversas demandas e necesidades do municipio.
Durante a xuntanza, os representantes municipais trasladaron a Arias varias peticións en nome dos veciños e veciñas, co obxectivo de mellorar a calidade de vida da poboación. O delegado territorial comprometeuse a estudar estas solicitudes e valorar a súa viabilidade.
Olga Capón, portavoz municipal do PP en Láncara, destacou a importancia deste encontro, subliñando que se trataron asuntos fundamentais para o municipio. "Falamos de temas relevantes para Láncara, necesidades que xa presentara con anterioridade e que debíamos concretar. O noso obxectivo é promover melloras en beneficio de toda a veciñanza, non só de aspectos concretos. Como oposición, é o noso labor reunirnos coas administracións e demandar accións da Xunta para impulsar proxectos necesarios", afirmou Capón.
Ademais, a portavoz mostrouse optimista tras a reunión, asegurando que saíu satisfeita polo compromiso acadado. "Esperamos que algunhas das nosas propostas poidan materializarse ao longo do 2025, xa que se trata de iniciativas fundamentais para o desenvolvemento do noso municipio", concluíu.