Organizan o II Encontro Máxico no Rural en Sarria, unha experiencia de maxia para todas as parroquias
Sarria volve converterse nun referente da maxia con motivo da celebración da segunda edición do Encontro Máxico no Rural, un evento que ten como obxectivo achegar a cultura e o espectáculo a todas as parroquias do municipio.
Despois do éxito rotundo da pasada edición, este ano o evento amplíase a seis novas parroquias, o que permitirá que máis veciños e veciñas disfruten desta máxica experiencia en familia.
Así, os días 12 e 13 de abril, recoñecidos ilusionistas como Iago Saavedra, Mago Iago, Roberto Lolo, Sara Rodríguez e Nacho Nogueira percorrerán as parroquias de Loureiro, Chorente, Betote, Manán, Goián e Vilar de Sarria, levando a maxia a todos os recunchos do concello.
O II Encontro Máxico no Rural preséntase como unha opción de entretemento de calidade e reforza o compromiso do Concello de Sarria coa descentralización da cultura. A través deste evento, as artes escénicas chegan a parroquias máis afastadas, garantindo que a maxia sexa accesible a todos os recunchos do municipio.
Organizado polo Concello de Sarria e coordinado por Roberto Lolo, este encontro promete sorprender e emocionar aos asistentes, consolidándose como unha cita imprescindible no calendario cultural do municipio. A maxia, a ilusión e a diversión están aseguradas para todos aqueles que se acheguen a este evento único e especial.