Os afectados pola expropiación ferroviaria en Sarria están convocados a unha reunión no Concello
O Ministerio de Transportes e Mobilidade Sostible vén de abrir o período de información pública do expediente de expropiación forzosa necesario para executar as obras de supresión de pasos a nivel na liña ferroviaria convencional Ourense–Monforte–Lugo, no seu tramo polo termo municipal de Sarria. No marco deste procedemento, todas as persoas propietarias dos bens e dereitos afectados están convocadas a unha reunión que terá lugar o vindeiro 11 de febreiro no Concello de Sarria, onde se procederá ao levantamento das actas previas á ocupación.
As actuacións forman parte do expediente 266ADIF2597, promovido polo Administrador de Infraestruturas Ferroviarias (ADIF), que iniciou formalmente o proceso o 28 de outubro de 2025 para dispoñer dos terreos necesarios. O proxecto, aprobado o 26 de xullo de 2022, inclúese no lote 4 da intervención e afecta ao punto quilométrico 386/169 da liña ferroviaria.
A aprobación do proxecto supón a declaración de utilidade pública e interese social das obras, así como a necesidade e urxencia da ocupación dos bens afectados, conforme á Lei do Sector Ferroviario e á Lei de Expropiación Forzosa. En consecuencia, a Dirección Xeral do Sector Ferroviario acordou abrir un prazo de 15 días hábiles para que os titulares e demais persoas interesadas poidan presentar alegacións por escrito.
Durante este período, o anexo de expropiacións poderá consultarse nas dependencias do Ministerio de Transportes e de ADIF en Madrid, así como no Concello de Sarria e nas subdelegacións do Goberno correspondentes. A documentación tamén estará dispoñible a través das páxinas web oficiais do Ministerio e do Portal de Transparencia de ADIF.
A reunión do 11 de febreiro no Concello de Sarria servirá para o levantamento das actas previas á ocupación, actuando esta convocatoria como notificación oficial para aqueles interesados descoñecidos ou con domicilio ignorado, sen prexuízo das citacións individuais que se realicen cando sexa posible.