Os Bolechas traen a súa nova aventura a Paradela co espectáculo 'O gran reto'
Paradela converterase nun escenario de diversión e deporte coa chegada dos Bolechas, que presentarán o seu novo espectáculo titulado O gran reto.
Esta actividade está incluída dentro do programa Falaredes 2025, promovido pola Secretaría Xeral da Lingua da Xunta de Galicia, e busca fomentar o uso do galego a través do entretemento familiar.
A actuación terá lugar o luns 4 de agosto ás 11:30 horas na Praza do Centro Polifuncional Xesús Mato Mato, cunha invitación aberta a todos os públicos para gozar dunha mañá chea de ritmo e ilusión.
Nesta ocasión, os populares irmáns regresan coa súa característica caravana cargada de sorpresas e enfróntanse a unha nova misión: superar un reto deportivo moi especial.
Todo comeza coa aparición dun misterioso personaxe que, cun saco cheo de probas, desafía aos Bolechas a poñerse en forma, practicar deporte e traballar en equipo.
O espectáculo combinará exercicio, cooperación e moito humor, ofrecendo unha proposta lúdica e participativa pensada para os máis pequenos e as súas familias.