Os residentes da Veiga de Láncara desfrutaron do concerto da Banda de Música da Comarca de Sarria
A Banda de Música da Comarca de Sarria (BMCS) celebrou un concerto no Complexo Terapéutico Xerontolóxico A Veiga, situado na Pobra de San Xiao, no Concello de Láncara, para o desfrute dos seus residentes.
O repertorio do concerto combinou obras de temática festiva, aproveitando a proximidade do Entroido, con pezas máis clásicas como boleros, muiñeiras, pasodobres e zarzuelas.
A diversidade musical permitiu que os internos non só desfrutasen da interpretación, senón que mesmo se animasen a bailar ao son da banda, facendo da xornada unha mañá diferente e moi entretida para todos os presentes.
Esta acción enmarcouse dentro da obra social da BMCS, que busca levar a súa música a toda a sociedade da comarca, prestando especial atención a aquelas persoas con dificultades para asistir a concertos convencionais.
O concerto no Complexo Terapéutico Xerontolóxico A Veiga só foi unha das paradas deste proxecto, que xa levou a banda a actuar na Residencia Nosa Señora do Carme de Sarria e no Centro de Atención a Persoas con Discapacidade da mesma localidade.
Con esta terceira intervención, a BMCS reafirma o seu compromiso coa inclusión e a música como ferramenta de alegría e conexión social, facendo que a cultura chegue a todos os recunchos da comarca.